Senin, 31 Oktober 2011

Pantun Minang "Kasiah tak sampai"



 "Kasiah Taksampai"
Mamakiak ombak manyisia pantai.
Pacah galombang dek batu karang.
Tingalah pasia bahati ibo
Badan bak cando kanai sinjundai.
Mato lalok hati batanggang.
Dinan kalam adiak tampak juo

Cewang kalangik raso kasampai.
Aka di bumi bahantakan.
Gamang di hati kasiah tak sampai.
Ramuak di dado batanguangkan


Jantuang putuih darah baserai.
Silalasiah tungga ka paureh nyo.
Indak den takuik kasiah tak sampai.
Sakik di dado apo ubek nyo
Antah ko anau nan salah daun.
Taisak santo mangana untuang.
Dalam rasian adiak barayun
Batali hati nan jo jantuang.

Antah kok sulam nan salah rendo.
Rusaklah banang dalam kumparan.
Dalam rasian cando ka iyo.
Lah raso di bibia tapi cawan.

Bakalah suluah dinan kalam
Bia ndak nyo tarang jalan baduo.
Tasintak badan tangah malam
Jatuah badarai aia mato.

Sajak pikek bapasangkan
Punai ditangan balapehkan.
Tangih kasia ka di kadukan.
Rasian dek ulah angan-angan.

Daun siriah gadanglah baa.
Lah masak pinang manantikan.
Oi  mimpi nyatolah baa.
Lah kuruih badan mananguangkan.