Bakucindan

Asam manih buah nyo kapunduang
Lamak di makan katiko malam
Diak manih nan bakaruduang
Bakaruduang lua nan jo dalam

Ikan mujaia ikan rayo
Lenggang lenggok dalam tabek
Lah den cubo tuak mandayo
Apo dayo ado nan ma ambek

Kok sanak pai karimbo.

Carikan rotan agak sakarek

Dari pado baputih mato.

Elok di hadang bia nyo dapek.

Lah di cubo mahelo banang
Tahelo banang kusuik
Lah ambo cubo tuak mahadang
Abak nyo nan mambuduik

Kudo balari kanai pilacuik

Ruponyo kudo padang tarok

Kalau abag nyo mambuduik

Umbuak sajo jo paisok

Kapasa bali panokok
Babali paku nan jo atok
Alah di agiah abak nyo rokok
Ruponyo indak maisok

Anak urang mambaka sarok

Mangkonyo banyak timbua asok.

Kalau abag nyo indak talok

Larikan sajo sadang lalok

Sarok di baka kalua asok
Asok mambubuang ka ateh atok
Di larian inyo kutiko lalok
Kok taraung nan sadang mangorok.

Dari ndak ado karajo.

Sarok babaka hari lah sanjo..

Antah kok iyo kamari bedo.

Umbuak anaknyo jo gulo-glulo.

Kalau indak tungu se jandonyo..

www.BatangPalupuah.com

Galau

Antah ko anau nan salah daun.

Manangih santo dalam gulungan.

Badan binaso dek paisok.

Dalam mimpi adiak barayun.

Batali hati nan jo jantuang.

Bagarah bakuncindan  dalam lalok.

Antah ko kain nan salah rendo.

Kusuik lah banang dalam kumparan.

Kusuik nan sia manyalasaikan

Dalam mimpi cando kaiyo.

Raso di bibia tapi cawan.

Sairing baduo kito bajalan.

Baka lah suluah dinan kalam.

Bia ndak tarang jalan baduo.

Tasintak badan tangah malam.

Jatuah badarai aia mato.

Sajak pikek bapasangkan.

Punai di tangan balapehkan.

Tangih kasia di kadukan.

Mimpi dek ulah angan-angan.

Batang siriah gadang lah baa.

Lah kuniang pinang manantikan.

Oi mimpi nyato lah baa.

Lah kuruih badan mananguangkan.

Bagarah / Marantau

Rancak nak gadih rang koto gadang..

Awak putiah rambuik bajombang....

Sadang bajalan di tangah hari.....

Kalau takuik jo obak gadang....

Biduk jan  baok ma hadang..

Elok ka Manijunjau mancari pensi.

Luruih lah jalan ka birugo.
Basimpang jalan ka auakuning
Batanyo pipik ka Pibondo
Musim pabilo padi manguniang

Alam banamo Minang kabau.
Nagari bapanungkek bapangulu.
Kok lai kasanang hiduik dirantau.
Kampuang halaman tingalah dulu.
Batang tabik aia nyo janiah.
Kabakeh minum urang kampuang.
Palapeh auih urang lalu.

Sawah di kampuang hanyo satampang baniah.
Parak hanyo satugaran jaguang.
Elok karantau denai dahulu.

Nak Urang Ranah balingka.
Pai kapasa di hari pakan.
Rang rantau pulang lah baa.
lah basamak jalan nan batingakan .

Tabang malayok balam tigo gayo.
tabang tinggi jalan ba apa.
harilah patang baliak ka sangka.

Malang nasibnyo baruak tuo
Badan ongkoh gigilah lunga.
Antah jo apo karambia kadiputa.
Jikok taragak karambia mudo.
Pa etongan urang ma nan tingga.
Lai kamujua karambia barisi.
Sajak sayang pidah kanan mudo.
Badang lalok di dangau tingga.
Karak babiak patang jo pagi.

Bancano

Daun siriah batang manjelo.
Usah diambiak di hari patang.
Kok lai tau sanak jalan kasarugo.
Tolong bimbiang kami manyubarang.

Tapacak paluah di kaniang
Raso kaputuih tali jantuang
mambaco ambo di korang singgalang
Di Padang alah ado pulo panari talanjang.

Abiaklah tasbiah kapamenan
Disinan latak rhido nyo tuhan
Cukuilah gampo jadi palajaran
Usah di undang murkonyo tuhan

Ubekan Denai

Pandang lah lauik di hari sanjo.
Ombak mahampeh,tapian mandayo.
Disinan kasih jo sayang nan bamulo.
Kutiko batamu pandangan mato.

Kini adiak baurai aia mato.
Duduak bamanuang bahati ibo.
Indak surang inyo di dunia nangko.
Apo bana di inyo nan mandayo.

Lambayuang sanjo lah manyirah.
Mato hari tabanam tinga sabalah..
Tandonyo langik jo bumi kabapisah.
Dek bulan jo bintang nan baulah.

Raso ka diambiak mato hari patang
Raso ka dijuluak bulan jo bintang
Paubek hati bia nak nyo sanang.
Usalah adiak bahati bimbang
Pantai banamo pantai muaro
Tampek nan mudo duduak baduo
Mamadu kasiah nan jo cinto
Manga adiak bahati ibo.
Awak gadih rancak pulo. Urang tadayo mancaliak nyo.

 

Kabau Padati

Tagaklah sutan manitah sambah.
sambah kabakeh alek nan datang.
Biduak tirih pandayuang patah.
Antah jo apo lauik kadi hadang.

Kambangkan lapiak di tangah rumah.
kabakeh alek malapeh anggah.
Lautan sati rantau batuah.
ilimu di badan hanyo sapanggalah

Rang parik Putuih marantang lukah.
Lukah di rantang hari lah patang.
Anak biawak nan badakek an.

Kasiah putuih sayanglah sudah.
Sanaglah adiak di tangan urang.
Dinataro awak bialah bakarilaan.

Anak biawak di sangko ikan.
Bamasuak kan sajo dalam pangorengan.
Sabalun awak bakarilaan.
Cincin tunagan tolong baliak kan.

Elo pukek rang elokan.
Di elo anak rang Pasaman.
Alah den elo di elokan
Malaleh kuduak dek pasangan.

Jikok pai kabukiktinggi.
kue sarabi tolong dibalikan
batanyo kabau ka padati.
Jauaaah lai parantian.

Babalaeh Pantun

Denai batanam bijo kapeh
Banang ka jadi baju sudah
Ijan jo tangih diak denai dilapeh
Janji jo adiak ndak barubah

                          Hari pakan di Bukiktinggi
                          Raminyo urang di pasa ateh
                          Sungguah taseso badan den kini
                          Nan di hati alah talapeh.....

Kok adiak pai kapakan

Elok pai di hari Rabu..

Dalam iyo adiak indak kan

Makonyo denai jadi ragu.

lamak bana makan jo ikan
ndak salamak ikan teri
bukan adiak maindak'kan
adiak digantuang indak batali.. 

Sauik-manyauik bunyi kacapi.

Di bunyikan urang di tangah hari..

Etan di ranah nagari suliki..

Bukanyo adiak digantuang ndak batali...

Denai mancari paruntungan diri..

basabalah adiak nan mananti.

kok cinto uda karananh minang
tapian usah tinggakan
kok cinto uda ka denai surang
usahlah pai bajalan ...

Ibo-maibo bunyi saluang...

bunyi bak cando ba pitunang...

.Amuah bana denai di kampuang...

Antah jo apo adiak ka denai pinang.

 di pacik janji gamgam pituah
sajalan kato jo sayang
lautan sati Rantau Batuah
mangkonyo denai tagamang...

Adiak tagamang tandonyo sayang...

kajadi rasian siang jo malam...

Alah dihinok di manuangkan.....

kaki malangkah tolong rilakan.

bukannyo ragu ka alang tabang
dek langik indak batapi
bukannyo ragu ka uda surang
dek dunia samakin sakti

Pai ka Rimbo kayu di tabang ....

Usah di tabang batang maranti...

Usahlah adiak bahati bimbang....

Do'a adiak kamanjadi paga diri.

bukik tinggi kota wisata
singgah sabanta di kabun bungo
nasi tasuok uda takana
nasi bakuah jo aie mato

tabang malayok buruang balam....

tabang mambaok untung diri..

tasintak lalok tangah malam .....

takana adiak di manyo kini.

Jalo den lapeh badan tarambau.. .

Patah lah kayu nan batiti... .

Untuang badan baanyo kini... .

Aso den lapeh angan den jangkau.. .

tajajak juo kampuang nagari ...

mukasuik maminang balahan hati....

Ramilah urang di aua kuniang....

rami de anak rang si junjuang...

Pai mangaleh manjua ikan.....

Tapajak paluaah di kaniang.....

Raso kaputuih tali jantung.....

mandanga adiak lah batunangan...

Rang minang batari Randai.....

Selo manyelo pupuik nan jo bansi....

Janji bakarang nan adiak ungkai....

raso kataban langik nan jo bumi.

Den pikek buruang saikua....

Buruang kapamenan hati nan ibo..

Tompangkan lah diak denai di dalam sangua...

Bia nak samo luluah jo kapalo.